Argazki zahar eta polit honen atzean gure herritar askorentzat gogoangarri den historia bat gordetzen da. Etxoin Berri baserriko Bizente Saizarrek eta Simona Azpirozek eman digute argazkiaren historiaren nondik norakoen berri eta guk gustu handiz entzun diegu. Entzuteaz gain, ordea, entzundakoa idatziz jaso eta herritar guztiei ezagutaraztea pentsatu dugu.

Argazkiaren erdian ageri den gizona da bilera handi honetako protagonista: Bizente Larrañeta jauna, Berastegin urte askoan lanean aritutako albaitari tolosarra. Gerra denboran bere burua nazionalisten alderdi politikoko kide bezala agertu zuen, eta hargatik, karlistek, lanik gabe uzteaz gain, bere jaioterritik kanporatu zuten.

Kontuak hala, Berastegiko herritarrek udaletxean bilera egitea erabaki zuten lanik gabe geratutako albaitari honen auzia eztabaidatzeko. Herritarrek Bizente Larrañeta albaitaria Berastegira ekartzeko nahia agertu zuten. Larrañeta jaunak, garai hartan, urteko zortzi mila pezetako diru-saria eskatu zien herritarrei, bere lanaren eta zerbitzuen trukean. Berastegiko baserritarrak denen artean dirutza hori ordaintzeko prest azaldu ziren, eta hala, Larrañeta albaitariari lana ematea erabaki zuten.

Bizentek eta Simonak diotenez, 1940-41 urte inguruan etorri zen Larrañeta jauna Berastegira, albaitari lanetara. Normalean Kakonen hartzen zuen ostatu, baina bere emazte eta hiru seme-alabekin etortzen zenean, Txoko Maiten egoten omen zen bere familiarekin. Berastegin ez ezik, Eldun, Elduaienen, Berrobin, Gaztelun eta Orexan ere lan egitera ailegatu omen zen gizona. Bizentek kontatu digunaren arabera, oso pertsona umila eta langilea omen zen, Berastegiko eta inguruko baserrietan makina bat lan egindakoa eta hamaika laguntza emandakoa. Ez omen zuen diru askorik izaten, eta hargatik, bizikletan edo oinez ibiltzen omen zen baserriz baserri.

Hogei urteren buruan, Bizente eta Simonaren ustetan, 1960-61. urte inguruetan izango omen zen erretiroa hartzeko asmoa adierazi zuenekoa. Hori zela eta, hainbeste urtetan herriko baserritarren mesedetan lan egin zuen albaitariari omenaldia egitea erabaki zuten Berastegiko herritarrek. Ordukoxea da, hain zuzen, argazki hau ere.
Omenaldia Kakone jatetxean eginiko bazkari batekin ospatu zen. Argazkiko lehen ilaran ageri dira garai hartako Berastegiko, Berrobiko, Elduaiengo et aElduko ordezkari nagusiak, eta baita herriko apaizak eta medikua ere. Hauetaz gain, herritar eta baserritar asko bildu zen omenaldiaren ospakizunetara, argazkian ikusten den bezala. Bazkariaren ondoren, hara bildutakoek obsekio edo opari bat egin zioten albaitari omenduari: urrezko erloju bat, hain juxtu ere.

Nola izaten diren kontuak! Argazkiaren historia kontatzeaz gain, argazkian ageri diren lagun guztien izen-abizenak ematen ahalegindu gara, nola ez, Etxoin Berriko Bizente Saizarren eta Simona Azpirozen laguntzaz. Asko dira, oraindik ere, omenaldi haren oroimena gordetzen duten herritarrak eta, haietxei eskaini nahi diegu artikulu hau.

Eserita daudenak:
 1. On Ignazio Olano, Elduko apaiza.
 2. Eusebio Goenaga, Elduko ordezkari nagusia.
 3. Alberto Belaunzaran, Berrobiko alkatea.
 4. Pio Labaien, Oiñeta Berrikoa eta Berastegiko alkatea.
 5. On Bizente Larrañeta, albaitari omendua.
 6. On Tomas Otaegi, Berastegiko erretorea.
 7. On Juan Yeregi, Berastegiko medikua.
 8. Simon Nazabal, Elduaiengo alkatea.
 9. On Jesus Zubillaga, Berastegiko apaiza.

Zutik daudenak, bigarren ilaran:
10. Juan Labaien, Lizarraga baserrikoa.
11. Bixente Saizar, Etxoin Berri baserrikoa.
12. Pedro Aldunzin, Donmartiñene baserrikoa.
13. Matias Saizar, Urlo baserrikoa.
14. Juan Bautista Iparragirre, Bulatzi baserrikoa.
15. Lorenzo Gorostarzu, Etxorde baserrikoa.
16. Bitoriano Goenaga, mendiko guarda.

Zutik hirugarren ilaran:
17. Andres Ansa, Kalexa baserrikoa.
18. Jose Azpeitia, Pateo baserrikoa.
19. Martin Urkizu, Elutse baserrikoa.
20. Hilario Ezeiza, Elduko Etxezar baserrikoa.
21. Pablo Irazusta, Elduko Goienetxe baserrikoa.
22. Pako Etxabe, Etxabene etxekoa.
23. Joakin Barrenetxea, Elduko Barrenetxea baserrikoa.
24. Nikolas Urreta, Arttoane baserrikoa.

25. Martin Arregi, Kakone jatetxekoa.Laugarren ilaran:
26. Martin Iparragirre, Ospital baserrikoa.
27. Bernardo Etxeberria, Estanko etxekoa.
28. Joakin Azpiroz, Antsone baserrikoa.
29. Jose Mari Urreta, Oiñeta Zar baserrikoa.
30. Luis Olaetxea, Patrine baserrikoa.
31. Tomas Arregi, Kakone jatetxekoa.
32. Alfonso del Rey, Berastegiko sekretarioa.
33. Frantzisko Tuero, Kakone ostatukoa.
34. Sebastian Agirre, Apizti dendakoa.
35. Jose Yeregi, herriko perratzailea.
36. Jose Ormazabal, ‘maixu xarra’.

Bosgarren ilaran:
37. Jose Azpiroz, Goienetxe baserrikoa.
38. Ildefonso Garziarena, Elaunde Azpi baserrikoa.
39. Justino Ustoa, Etxetxo baserrikoa.
40. Justo Arregi, Kakone jatetxekoa.
41. Gillermo Otermin, Denda berri etxekoa.
42. Ignazio Rekondo, Santune etxekoa.
43. Martin Aranalde, Patxiketorrenea baserrikoa.
44. Juan Bautista Saizar, Etxetxiki baserrikoa.
45. Jose Saizar, Antziola baserrikoa.
46. Patxi Lopetegi, Apizti dendakoa.
47. Ebaristo Garziarena, Malengone baserrikoa.
48. Migel Lizartza, Martintxone baserrikoa.