Lehen saioan irabazten badute finalerdietara pasako dira hiru neskak Olatz Etxeberria, Garbiñe Ezkerra eta Amaia Azkue ETB 1eko Mihiluze saioan ikusiko ditugu otsailaren 23an. Berastegiar hauek urduri samar daude grabaketaren aurretik eta probak ondo egiteko zortea behar dela aitortzen dute.

Maialen Zubeldia

Olatz Etxeberriak Kuxkuxeroak programan parte hartu zuen duela bi urte inguru. Jendea behar zutela eta, izena eman zuen. Proba bat pasa ondoren, bromak egiten ibili zen telebistan: “Lau esketx inguru grabatu nituen, Donostian eta Urbilen”, argitzen du berastegiarrak.

Hiru neskak Berastegiko Antzerki Taldean parte hartzen dute eta mundu hori gustukoa dute. Kike Amonarriz herrian eman zuen hitzaldi batean ezagutu zuten eta berarekin antzerkiaren inguruan solasean aritu ziren: “Euskal Hizkuntzari buruzko hitzaldi bat ematera etorri zen Amonarriz Berastegira. Antzerkiaren mundua ere ezagutzen duenez, berarekin solasean aritu ginen gai horren inguruan”, azaltzen dute hiru neskek. “Denboraldi bat geroago, telefonoz deitu zuen programaren berri emanez eta parte hartzera animatuz”.

Lehiaketaren aurrean urduri
Olatzek, Garbiñek eta Amaiak casting bat egin zuten Mihiluze saiorako. Denbora gutxira jakin zuten programan lehiatzeko aukeratuak izan zirela: “Hasieran, programa nolakoa zen oso ziur ez geundenean, ilusio gehiago genuen. Lehiaketa errazagoa izango zela uste genuen”, aitortzen dute mihiluzeek. “Baina orain, telebistan bi saio ikusi ondoren, ez dirudi hain erraza denik. Parte hartzeko gogoz gaude, baina beldur pixka bat ere badugu”.

Mimika proba, txisteak kontatu, …
Hirukote honek zazpi proba egin beharko ditu ahalik eta puntu gehien lortu eta finalerdirako sailkatzeko: bertsoen errimak asmatu, mimika egin edo txisteak kontatu. Esan beharra dago, programan ez direla neska hirukote asko ikusi orain arte: “Programako arduradunek esan digute talde gehienetan mutilak daudela”, argitzen dute berastegiarrek.